ថ្លែងនៅលើកម្មវិធី Charla Podcast អតីតខ្សែបម្រើ PSG និងប្រេស៊ីលលោក Rafinha Alcântara បាននិយាយពីមូលហេតុដែលកីឡាករកម្រិតកំពូល៣នាក់លេងជាមួយគ្នា ប៉ុន្តែមិនអាចជួយក្លិបឈ្នះពានធំៗបាន។
Rafinha Alcântara ថ្លែងបែបនេះ៖ «ក្នុងអំឡុងពេលហ្វឹកហាត់មុនបើករដូវកាលដំបូង កីឡាករគ្រប់គ្នាបង្ហាញវត្តមានមិនខ្វះសូម្បីតែម្នាក់ តែខ្ញុំបានមើលឃើញថា៖ ក្រុមមួយនេះមិនអាចដំណើការបានជោគជ័យទេ»។
«តស់! ចាប់ផ្តើមពីអ្នកចាំទី៖ Keylor Navas ឬ Donnarumma សុទ្ធតែជាអ្នកចាំទីល្អហើយចង់លេងក្នុងជម្រើសដំបូង អ្នកណាមិនបានលេង អ្នកនោះនឹងខឹង វានឹងមានជម្លោះ»។
«ក្នុងតំបន់ការពារ៖ Marquinhos ជាអ្នកចាប់ផ្តើមរហូតគ្មានអ្នកណាអាចមកជំនួសគាត់បានទេ។ Kimpembe ជាតារារបស់ PSG និង Sergio Ramos ជាខ្សែការពារពេញលេញល្អបំផុត»។
«នៅក្នុងយតំបន់ប្រយុទ្ធ Di María, Mbappe, Neymar និង Messi ។ តើអ្នកដកអ្នកណាចេញ? Di María ជាកីឡាករសំខាន់នៅក្នុងក្រុម ហ៊ានតែដកគាត់ ក្រុមនឹងមិនដំណើការទេ។ មួយណាក៏ដកមិនបានដែរ»។
«សម្រាប់គ្រូបង្វឹក វាពិតជាមិនអាចទៅរួចទេ សម្រាប់គាត់។ ពួកគេគឺជាក្រុមដ៏ល្អបំផុតនៅក្នុងពិភពលោក កីឡាករសុទ្ធតែល្បីៗផុតលេខ ប៉ុន្តែនៅពេលជាមួយគ្នានេះ ពិតជាពិបាកក្នុងការគ្រប់គ្រង។ ខ្ញុំមិនលេងទេ ដូច្នេះខ្ញុំកំពុងមើលពួកគេលេង ខ្ញុំដឹង។»
PSG មិនដែលបានឡើងដល់វគ្គ៨ក្រុមចុងក្រោយពានរង្វាន់ Champions League ជាមួយក្រុមកីឡាករទាំងនេះនោះទេ។ ប៉ុន្តែពួកគេបែរជាឈ្នះពាននេះទៅវិញ បន្ទាប់ពីបោះបង់ Neymar, Mbappe និង Messi ។