អតីតខ្សែបម្រើប្រយុទ្ធស្លាបក្លិបបិសាចក្រហម Manchester United កីឡាករ Demetri Mitchell ពន្យល់ថា គាត់បានប្រើ ChatGPT ចរចាកុងត្រាជាមួយក្លិបលីគទី៣អង់គ្លេស Leyton Orient នៅរដូវក្តៅនេះ ។
ថ្លែងក្នុងកម្មវិធី From My Left Podcast កីឡាករវ័យ២៨ឆ្នាំរូបនេះថា៖ «ChatGPT គឺជាភ្នាក់ងារដ៏ល្អបំផុត ដែលខ្ញុំធ្លាប់មាននៅក្នុងអាជីពបាល់ទាត់របស់ខ្ញុំ។ ក្លិប Leyton Orient បានផ្ញើសំណើមកខ្ញុំ ហើយខ្ញុំបានប្រើ ChatGPT ដើម្បីសួរពីរបៀបចរចា និងអ្វីដែលត្រូវនិយាយ»។
ChatGPT បានជួយគាត់ក្នុងការគណនាតម្លៃនៃការផ្ទេរទៅកាន់ក្លិបមានមូលដ្ឋាននៅទីក្រុងឡុងដ៍មួយនេះ ដូច្នេះហើយចំនួនប្រាក់ខែដែលគាត់ចង់បាន ក៏សួរយោបល់ ChatGPT រួចហើយដែរ។
Demetri Mitchell បានចុះកុងត្រាលេងឱ្យក្លិបនៅថ្ងៃទី 27 ខែមិថុនា ឆ្នាំ 2025 ដោយគាត់បានបង្ហាញខ្លួន ៨ ប្រកួតរកបានមួយគ្រាប់។ កីឡាកររូបនេះជាអតីតយុវជនថ្នាលរបស់ក្លិបបិសាចក្រហម Manchester United និងត្រូវបានតំឡើងមកលេងក្នុងក្រុមធំ ប៉ុន្តែបង្ហាញខ្លួនផ្លូវការបានតែមួយប្រកួតប៉ុណ្ណោះហើយក៏ដាក់ឱ្យលេងខ្ចីជើងនៅក្លិបផ្សេងៗទៀតជាហូរហែ៕